ETİLEN-PROPİLEN POLİMERİNİN KLİNKERSİZ SEMENT DAŞININ MƏSAMƏLİ QURULUŞUNA TƏSİRİ

Müasir sement sənayesində portlantsementin çatışmadığı bir şəraitdə 200...300 markalı azklinkerli və klinkersiz yapışdırıcıların alınma texnologiyalarının yaradılması vacibdir. Digər tərəfdən yanacaq-enerji məsrəflərinin artdığı bir dövrdə istehsal prosesində onların sərfinin aşağı salınması buraxılan məhsulun səmərəliliyinin artırılması yollarından biri sayıla bilər. Ona görə də sement istehsalı sənayesində emal üçün daha az yanacaq-enerji məsrəfləri tələb edən və portlandsementə nisbətən 2...2,5 dəfə az kapital qoyuluşuna malik klinkersiz sementin istehsalı iqtisadi cəhətdən səmərəlidir. Hazırkı tədqiqat işində klinkersiz sement daşının məsaməli quruluşunun onun möhkəmliyinə təsiri araşdırılmışdır. Məlum olmuşdur ki, klinkersiz sement əsasında olan sement daşlarının məsaməli quruluşu, klinker sementinə nisbətən geniş diapazonda dəyişir. Ona görə də, klinkersiz sement daşının möhkəmliyini artırmaq üçün ən səmərəli üsullardan biri etilen-propilen polimerinin (heptanda 16%-li məhlulu) yapışdırıcının tərkibinə qatılmasıdır. Müəyyən olunmuşdur ki, etilen-propilen polimeri sement daşının məsaməli quruluşunu nizamlayaraq onun möhkəmliyini 20-25% artırmışdır. Açar sözlər: etilen-propilen polimeri, n-heptan, əhəng, seolit, kül, qips.