”Böyük İqtisadi Ensiklopediya” mötəbər və unikal bilik mənbəyi

Ensiklopediya - təkcə həyatın müxtəlif sahələrinə dair lüğət formasında, əlifba sırası ilə tərtib olunmuş məlumat-sorğu toplusu deyil, həm də elmi biliklərin sistemləşdirilmiş mənbəyidir. Cəmiyyətin və zamanın güzgüsü hesab olunan ensiklopediyalar, sözlərin məna və təyinatı barədə minimum informasiya verən lüğətlərdən fərqli olaraq, oxucuya daha geniş və əhatəli biliklər təqdim edir. Eyni zamanda, ensiklopediyalar hər bir xalqın və dövlətin intellektual potensialının mühüm göstəricisi kimi dəyərləndirilir. Azərbaycanda ensiklopediya yaradıcılığının və mədəniyyətin yüksəlişi ulu öndər Heydər Əliyevin adı ilə bağlıdır. Ötən əsrin 70-ci illərində onun təşəbbüsü və rəhbərliyi ilə hazırlanıb nəşr edilmiş “Azərbaycan Sovet Ensiklopediyası”nda ölkəmizin tarixi keçmişi və mövcud vəziyyəti, xalqımızın mədəni-mənəvi irsi haqqında, sosial-iqtisadi potensialı haqqında kifayət qədər geniş məlumatlar toplanmışdır. O dövrün elmi-intellektual elitasının fəal iştirakı ilə yazılmış, sovet ideologiyasının müəyyən etdiyi çərçivələr daxilində milli kimliyimizin ən vacib elementlərinin yüksək peşəkarlıqla əks olunduğu oncildlik ensiklopediyanın nəşri ölkəmizin elmi və mədəni həyatında çox mühüm tarixi hadisə olmuşdur. Bu sanballı nəşr indinin özündə də elmi-informativ zənginliyi, məzmun mükəmməlliyi ilə möhtəşəm tarixi əhəmiyyətini qoruyub saxlamaqdadır.