Mbi disa lloje të ligjërimit në Kuran

Libri i shenjtë, Kurani Famëlartë, është fjalë e Allahut (xh.sh.) që e  ka zbritur në periudhën kohore prej 23 vitesh mbi të Dërguarin e fundit, Muhamedin (a.s.). Si i tillë, ai ka sfiduar botërat dhe çdo krijesë. Kurani përçon në vetvete jetë, ilustrim dhe frymëzim shpirtëror dhe qenia njerëzore e ka të pamundur të japë shpjegimin mbi sekretin e këtij fenomeni. Fjalët e tij dëshmojnë mjaft mirë, se është e pamundur të imitohet Kurani dhe stili i rrëfimeve të tij është i paarritshëm. Kurani i dhuron myslimanit vizion të plotë dhe program të qartë, të ngjeshur dhe jetën ia bën të ecë në vijën e ekuilibruar, duke mos u ndeshur me asgjë tërë kohën. Ky vizion, po ashtu, e unifikon diturinë me besimin, duke bërë që njeriu, pas materies, të jetë përsëri me materien. Po ashtu, ky vizion lidh sekretet me emocionet e ndjeshme dhe asnjëherë nuk i lë ato që të ndahen. Është tashmë e ditur që, nëse ne do t’i përmbahemi vizionit kuranor dhe do të meditonim për shenjat e Zotit te krijesat, do të kishim një psikologji e cila do të njihte madhështinë e Krijuesit, që kur e ka krijuar njeriun.