ڕەهەندە گوزارشتگەراییەکانی هونەری پەيكەرتاشيى کۆن لەكوردستاندا

ئەم توێژينەوەيە بەناونیشانی (ڕەهەندە گوزارشتگەراییەکانی هونەری پەيكەرتاشيى کۆن لەكوردستاندا) بریتییە لەتوێژینەوەیەکی هونەری  و ئیستاتیکی دەربارەی دەرخستنی دەربڕینخوازی و گوزارشتی هونەريی پەيكەرتاشيى کۆن لەكوردستاندا. توێژينەوەکە بوار گەلێكى تايبەتی تەرخان كردووە بۆ باسكردن و ڕۆڵ و گرنگی هونەری پەيكەرتاشینی سەر بەرد لەقەد پاڵی چیاکان لەخاکی کوردستاندا. ئەم کردارەش به ‌ڕێگه‌ى لێگرتن و لێكردنه‌وه‌ى پارچه‌ به‌ردى بچووک و مامناوەند لەسەر ڕووی شاخەکان ئەنجامدراوە، به‌ مه‌به‌ستى بنیاتنانى په‌یكه‌ر، كه‌ هه‌ڵگرى شوناس و گوزارشت و ئاماژه‌ و شێوەیەکی دیاری كراوه‌. به ‌گشتى له‌قۆناغەکانی شارستانییەتی میزۆپۆتامیادا، پاشماوه‌ى شوێنەواری و هونەری په‌یكه‌رى داتاشراوی بەردین لەقەد پاڵی چیاکاندا به ‌میرات بۆ خاکى كوردستانی کۆن و ده‌وربه‌رى ماوه‌ته‌وه‌. هەروەها توێژینه‌وه‌که‌ له‌ پوختە و چوار بەش پێکهاتووە، تیایدا ئاماژە بە کێشە و گرنگی و ئامانج و سنوور و ماوەی توێژینەوە و پێناسەی زاراوەکان کراوە. لەگەڵ ئەنجام و دەرئەنجام و پێشنیاز خراونەتەڕوو، کە توێژەر لەمیانەی پۆلین كردن و شیکردنەوەی نموونەکان توانیویەتی گوزارشتکاری لەهونەری پەيكەرتاشيى کۆن لەكوردستاندا بخاتەڕوو.