Hipomineralizimi i molarit dhe incizivit

Çrregullimet strukturale të smaltit dentar janë patologji që hasen shpesh tek dhëmbët e përhershëm. Ato variojnë në paraqitjen e tyre përsa i përket shtrirjes, kufizimit, si dhe ngjyrimit të lezioneve. Në kuadrin e lezioneve strukturale, hipomineralizimi me origjinë sistemike i një deri në katër molarëve të parë të përhershëm të shoqëruar dhe me prekjen e incizivëve, është përkufizuar si një formë e veçantë me emrin hipomineralizimi i molarit dhe incizivit (HMI). Përgjatë viteve të fundit janë realizuar një numër i madh studimesh në lidhje me faktorët etiologjikë, epidemiologjinë apo paraqitjen klinike të kësaj patologjie.