"Tar – Azərbaycan musiqi alətlərinin tacı” kitabı elmi audio-vizual ensiklopedik mənbədir

Resenziya milli musiqi mədəniyyət tariximizin öyrənilməsi baxımından qiymətli elmi-nəzəri audio-vizual ensiklopedik mənbə olan “Tar – Azərbaycan musiqi alətlərinin tacı” kitabının kulturoji aspektdən geniş şərhidir. XXI əsrdə Azərbaycanın yeni mədəniyyət modelinin formalaşdırılması dövründə incəsənət, o cümlədən musiqi sənəti tariximizin öyrənilməsi, gələcək nəsillərə ötürülməsi və qlobal səviyyədə tanıdılması mühüm vəzifələrdən biridir. Kitab milli irs xəzinəmizdə “mədəni etnobrend” statusunu daşıyan tar alətinin təşəkkülü və inkişafı, quruluşu, onun düzəldilməsi sənəti və ənənələrinə həsr olunub. Burada Mirzə Sadıq Əsəd oğlunun (Sadıqcan) tar islahatları, tar alətinin muğam janrı ilə bağlılığı, bəstəkar yaradıcılığında yeri, tar ifaçılarının bioqrafik məlumatları, tar alətinin müasir musiqi təhsilində rolu ayrı-ayrı fəsillərdə əksini tapır. Resenziya elmi ictimaiyyətə və milli mədəniyyət tarixinə maraq göstərənlərə ünvanlanıb. Resenziya tar alətinin tədqiqi sahəsində naviqator qismində çıxış edərək gələcəkdə bu sahədə fikir mübadiləsini təşviq edir.