MBI ORIGJINËN SHQIPTARE TË PAPËS KLEMENTI XI - ALBANI

Artikulli trajton origjinën shqiptare të Papës Gianfrancesco Albani - Klementi XI (1700-1721), i cili i interesuar për prejardhjen e tij ngarkoi në vitin 1720 jezuitin Filippo Riceputi, i cili së bashku me arbëreshin nga Zadari (Zara) Paçifik Bicin të ndërmerrnin një udhëtim në Shqipëri dhe të mblidhnin relacione që hidhnin dritë mbi familjen Albani, e cila në fillim quhej Laçi. Fokusi i kërkimeve ishin zonat nga e kishte prejardhjen familja: Laçi i Kurbinit, Laçi i Zadrimës dhe Laçi i Krasniqes në Tropojë e në Kosovë. Sipas relacioneve, familja duhet ta ketë origjinën nga Laçi i Kurbinit, por ka gjasa që të jetë edhe nga zona e afërt e Laçit të Zadrimës. Prania e mbiemrit Laçi në Kosovë hedh dhe hipotezën që familja të jetë zhvendosur nga verilindja drejt Arbërisë Qendrore dhe më pas të ketë emigruar në Itali.