ANG HABI NG HININGA AT IBA PANG TULA

Marso 2020, nagbago ang buong mundo. Dumating ang pandemya ng Covid. Walang nakapaghanda. Marami ang di makapaniwala at sinubukan pa ring paikutin ang mundo nang normal at magtrabaho o mag-aral pero lahat ay walang nagawa. Lockdown. Bawal lumabas. Bawal maglaro. Bawal makipag-date. Bawal humawak. Di mabilang ang ipinagbawal. Siguro kung pwede lang ipagbawal ng gobyerno ang paghinga eh ginawa rin. Pero kung titingnan ang mga nangyari noong pandemya ay para na ring ipinagbawal ang paghinga. Dahil kung susumahin ay makikitang marami sa mga naging hakbang ng gobyerno ay saliwa sa maayos na pamamahala. Di malaman kung lockdown ba o hindi lockdown. Di malaman kung sino ang pwedeng lumabas. Di malaman kung ilang pulgada ba ang dapat maging distansya sa isa’t-isa sa loob ng mga pasilidad at mga sasakyan. Di malaman kung saan tatakbong ospital kapag tinamaan ng sakit. Di malaman kung mapaglalamayan man lang ba ang mga namatay na mga mahal sa buhay. Lahat ay inutusang mamalagi sa bahay at magkulong.