جیهانی نەست وەک بنەمایەکی سوریالیزمی لە دەقی شیعری (١٨/١١/١٩٦٥)ی سەباح ڕەنجدەردا

پوخته    سوریالیزم، وەک بزووتنەوەیەک کە لەسەرەتای سەدەی بیستەمدا خۆی ناساند، ئامانجی ڕزگارکردنی بیرکردنەوە و زمان و ئەزموونی مرۆڤ بوو لە سنووری عه‌قڵگه‌راییدا. لە کاتێکدا کە لە ئەوروپا دەستی پێکردووە، کاریگەرییەکەی لە ئاستی جیهانیدا لە کولتوور و نەریتە ئەدەبییە جیاوازەکاندا پەرەی سەندووە، ئەدەبیاتی کوردیش، بەتایبەتی ژانرێکی وەک شیعر بە مێژووە دەوڵەمەندەکەی و شوناسە زمانەوانی و کولتوورییە جیاوازەکەیەوە، لە چوارچێوەی ئەم بزووتنەوەیە  بێبەش نەبووە، بەڵکو تاڕادەیەکی باش پەیڕەویکردووە. ئەمە لەلایەک، لەلایەکی دیکەوە جیهانی نەست و خەونەکان دوو جیهانن، کە سوریالیزمەکان کردوویانە بە بنەمای ڕێبازەکەیان، چونکە بریتین لە کانگای وێنە و خەیاڵ، کە لە ڕێگەی کۆمەڵێک شێوازی نووسین و تەکنیکەوە ده‌ریده‌بڕن. هەروەها ئەو شوێنە فریادڕەس و ئارام بەخشەیە، کە دەتوانن مه‌به‌سته‌كانیان تێدا دەرببڕن و داهێنانی هونەرییان تێدا ئەنجام بدەن و بەرەو جیهانی سەرووی واقیع بچن، بۆیە بە پێویستمان زانی ئەم بابەتە لەم توێژینەوەیەدا بەسەربکەینەوە بە ناونیشانی ( جیهانی نەست وەک بنەمایەکی سوریالیزمی لە دەقی شیعری ''١٨/١١/١٩٦٥'' ی سەباح ڕەنجدەر) بەو پێیەی، کە (سەباح ڕەنجدەر) وەک یەکێک لە شاعیرە سوریالیزمەکانی قۆناغی ئەمڕۆی شیعری کوردی، گرنگییەکی زۆری بە جیهانی نەست و خەون لە دەقە شیعرەکەییدا داوە و توانیوویەتی ئەدگارەکانی سوریالیزمیش لەو دەقەدا بەرجەستە بکات.