MÜASİR DÖVRDƏ KİBERCİNAYƏTKARLIQ

XXI əsrdə elmi-texniki tərəqqinin yeni – informasiya inqilabı adlanan mərhələsi həyat səviyyəsinin və sosial rifahın yüksəldilməsinə yönələn nəticələri ilə yanaşı, milli, hərbi və siyasi, xüsusilə də sosial təhlükəsizliyə təhdid olan yeni cinayətkarlıq formalarının inkişafı və genişlənməsinə də təkan vermişdir. Hazırda ölkələrin kibersisteminə qeyri-qanuni şəkildə daxil olmaq, sistemi istismar etmək və ya pozmaq fəaliyyəti milli təhlükəsizlik üçün təhdid amilinə çevrilmişdir. İnformasiyanın və ya elektron cihazların, proseslərin, məlumatların emalı zamanı istifadə edilən texnologiyalar sisteminə qəsdən və ya icazəsiz giriş, onun manipulyasiyası və ya məhv edilməsi məqsədilə həyat keçirilən kiberhücumlar əqli mülkiyyət itkilərinin iki dəfə artmasına səbəb olmuşdur. Elm və texnologiyalar insanların həyat tərzinin yaxşılaşdırılmasına yönəlmişdir, lakin informasiya texnologiyalarının sürəti həyat mobilliyini artırmış, təhlükəsizlik baxımından yeni narahatlıqlar yaratmışdır. XXI əsr yeni dünya nizamının formalaşması insanların rifahına və ümumilikdə mövcud olmasına təhlükə yaradan cinayətkarlığın yeni formalarda təzahürünə gətirib çıxarmışdır. Hazırda klassik oğurluq və fırıldaqçılıq kimi cinayət əməlləri fiziki təmas və ya qurbanla eyni yerdə olmadan virtual mümkünlük qazanmışdır. Son onilliklərdə nəinki hər il, hətta hər ay yeni formaları ortaya çıxan kibercinayətlərin bitkin və əhatəli tərifi bu gün üçün mövcud olsa belə, natamam xarakterli olardı. Bununla yanaşı, kibertəhdid və cinayətlərin çoxsaylı, dar və geniş mənada izah və tərifləri mövcuddur.