YAXIN VƏ UZAQ PERSPEKTİVDƏ ZƏNGƏZUR QLOBAL NƏQLİYYAT DƏHLİZİNİN STRATEJİ ASPEKTLƏRİ

Tədqiqatın məqsədi – yaxın və uzaq perspektivdə Zəngəzur Qlobal Nəqliyyat Dəhlizinin strateji aspektləri tədqiq etməkdən ibarətdir. Müasir qlobal trendlər nəzərə alınmaqla, yeni reallıqlar şəraitində Zəngəzur dəhlizinin regional və beynəlxalq üstünlükləri açıqlanmışdır. Zəngəzur dəhlizinin istifadəyə verilməsi region ölkələrinin maraqlarını özündə ehtiva etməklə yanaşı Avropa ilə Asiyanı birləşdirəcək səmərəli marşrut kimi xarkaterizə edilmişdir. Zəngəzur dəhlizinin açılmasının Türk coğrafiyasının birləşdirilməsində və Türkdilli dövlətlərin inteqrasiyasının sürətləndirilməsində strateji rolu əsaslandırılmışdır. Zəngəzur dəhlizinin istismara verilməsindən sonra beynəlxalq yük dövriyyəsinin artması və yüklərin daşınmasının əlverişli olması ilə bağlı materiallar əks olunmuşdur. Hazırkı reallıqlar və mürəkkəb geosiyasi, geoiqtisadi amillər əsas götürülməklə Zəngəzur Qlobal Nəqliyyat Dəhlizinin strateji aspektlərinin əhəmiyyəti və gözlənilən nəticələri ümumiləşdirilmişdir. Tədqiqatın metodu kimi – ilk növbədə bir qrup elmi metodlardan- analiz, sintez, müqayisə və ümumiləşdirmə metodlarından istifadə olunmuşdur. Eyni zamanda, məqalədə müzakirə olunan problemlərə dair bir sıra tədqiqatçıların elmi əsərlərinə də istinad edilmişdir. Tədqiqatın nəticələri – məqalədə əldə edilən elmi nəticələrdən Zəngəzur Qlobal Nəqliyyat Dəhlizindən səmərəli istifadə edilməsinə dair konseptual yanaşmaların formalaşdırılması və tədbirlərin görülməsi məsələlərində istifadə oluna bilər