Dos poemes poco conocíos

Ufiertamos dos poemes (ún del sieglu XVII, otru del XIX) qu’amuesen un testimoniu llingüísticu dixebráu del usu de la llingua asturiana en dos sieglos averaos. Nel casu primeru un poema fechu n’Asturies en castellán apaez llingüísticamente entremecíu con rasgos de tipu portugués y asturianu. Nel segundu conséñase un poema de 1843, cuasimente desconocíu del públicu llector; vien n’asturianu dafechu y ufre un tipu de llingua bien iguáu, con un modelu de tipu norteño-oriental lo qu’enllaza con otres manifestaciones lliteraries que tamién algamaren la imprentación naquella dómina. Entenderáse asina que la lliteratura asturiana cola recoyida de materiales escritos de los sieglos medios y modernos, perpoco conocíos en llinies xenerales, podrá encontar l’oxetivu de collaborar a una edición allargada en materiales que vayan más allá y lloñe de los yá conocíos pola Historia de la Lliteratura Asturiana asoleyada pola Academia de la Llingua Asturiana en 2002. Les coleiciones de recuperación de testos qu’esta institución académica vien asoleyando con procuru, de magar la so nacencia, paecen ufrir un camín afayadizu qu’empobina a meyor conocer un idioma que tien una tradición escrita continuada más estimable que lo que de mano abultaría aguardase. Pallabres clave: llingua asturiana, lliteratura asturiana, historia de la lliteratura asturiana.