PAGGALUGAD SA KARANASAN NG MGA GURO SA PAGSASAKATUPARAN NG PAGTUTURO SA FILIPINO SA ELEMENTARYA SA IKA-21 SIGLO: ISANG PENOMENOLOHIKAL NA PAG-AARAL

Ang layunin ng pag-aaral na ito ay galugarin ang mga karanasan ng mga guro sa elementarya na nagtuturo ng Filipino sa ika-21 siglo. Sinusuri nito ang kanilang mga pananaw, mga natamo mula sa kanilang karanasan, at kung paano nila hinarap ang mga hamon sa kanilang pagtuturo. Gumamit ng kwalitatibo na pamamaraan ng pananaliksik upang kolektahin ang kanilang mga karanasan, hamon, at mekanismo mula sa hamon na kanilang natamo. Ang mga datos na nakalap ay pamamagitan ng mga panayam at obserbasyon sa kanilang pang-araw-araw na mga gawain sa pagtuturo. Labing-apat na mga guro na nagtuturo ng Filipino sa elementarya ang naging kalahok sa pag-aaral. Ang mga resulta ng pag-aaral ay nagbigay-diin sa mga sumusunod na karanasan ng mga kalahok: kahirapan sa pagkuha at pagpapanatili ng atensyon ng mga bata, kakulangan sa kahandaan sa pagtuturo, paglaan ng oras sa pagsalin ng mga salita sa ibang wika, hamon sa emosyonal, na aspeto. At bilang tugon sa mga hamon, itinuring ng mga guro ang mga sumusunod na mekanismo sa pagharap una ay ang pagkakaroon ng mahabang pasensya, paggamit ng iba’t ibang estratehiya sa pagtuturo, pagiging inspirasyon sa mga bata upang mapahusay ang pagtuturo, pagbibigay ng premyo para sa aktibong pagtuturo. At sa kanilang pagninilay, natamo nila ang sumusunod na pananaw: Huwag mawalan ng pag-asa sa pagtuturo, gawin ang tungkulin bilang guro, maging determinado sa pagtuturo. Ang pag-aaral ay nagbigay-liwanag sa mga karanasan at mekanismo ng mga guro sa elementarya at nagmumungkahi ng mga paraan upang mapabuti ang kanilang paghahanda at pagtugon sa mga hamon sa kanilang propesyon sa ika-21 siglo. MGA SUSING SALITA: pagtuturo, Filipino, guro, elementarya, paggalugad, karanasan