ЗОРОАСТРИЗМДИН ОРТО АЗИЯДАГЫ ТАРЫХЫ

Зороастризм б.з.ч. VI кылымдарда азыркы Ирандын аймагында пайда болгон жана перстердин улуттук дини болуп эсептелет. Орто Азия аймагында перстер да жашагандыктан аймактын зороастризм менен кандайдыр бир байлынышы болгонун ойлосок болот. Бирок, зороастризм жайылган аймактарды бир гана перстер менен чектеп караганыбыз да туура эмес. Анткени, түрк элдеринин арасынан да зороастризмди кабыл алгандар болгон. Зороастризмдин улуттук дин экени чындык. Бирок, зороастризмдин түрк элдери арасында да жайылганы кызык жагдайды түзөт. Улуттук дин өзүнүн улутунун сыртына чыкпашы керек эле. Индияга качып барган зороастристтер жергиликтүүлөр тарабынан парси деп аталган. Бул зороастризмдин перс элдери менен бүтүндөшкөнүн айгинелейт. Түрк элдери арасында зороастризмди кимдер кабыл алган болушу мүмкүн деген суроо туулат. Учурда зороастризмге таандык терминдерди улуттук жана диний баалуулуктардын ичинде колдонуп келебиз. Ал терминдердин кандай себептерден улам бизге жетип келгенине да тактоо киритүү керек. Андыктан бул макалада зороастризмдин Орто Азия жана ал аймакта жашаган элдер менен байланышына, ошондой эле Кыргызстандын аймагындагы таасирине токтолобуз.