Pagbuo ng mga Kontekstuwalisadong Araling Eksemplar para sa Pagpapahusay ng Pagbasa: Isang CRLA-Based na Pagsusuri ng Kahusayan ng mga Mag-aaral sa Baitang 2

Naglalayon ang pananaliksik na matukoy ang kakayahan sa pagbasa nang malakas ng mga mag-aaral sa Baitang 2 ng Talaibon Elementary School upang makapagbuo ng mga araling eksemplar para sa kontekstwalisadong interbensyon gamit ang balanseng pagdulog. Gamit ang Comprehensive Rapid Literacy Assessment (CRLA), tinukoy ng pag-aaral ang lebel kakayahan sa pagbasa ng salita at pangungusap, bilis sa pagbasa, lebel na kailangang interbensyon at pang-unawa sa binasa. May kabuuan na 87 mag-aaral ang sangkot sa pag-aaral na sumasaklaw sa buong Baitang 2. Batay sa CRLA, karamihan sa mga mag-aaral sa Baitang 2 ay grade-ready sa pagbasa ng Filipino subalit nasa sangkapat na bahagi pa rin ang ang nahihirapan sa pagbasa ng mga salita na binubuo ng 3 hanggang 4 na pantig. Karamihan din sa kanila nakababasa lamang ng 21-40 at 41-60 mga salita sa loob ng isang minuto sa tekstong binubuo ng 96 na mga salita. Kaunting bahagdan ng mga mag-aaral ang reading at-grade level na may kakayahang sagutin nang tama ang lahat ng mga tanong sa pag-unawa sa kwento. Ang mga lebel na non-grade ready tulad ng emerging, developing at transitioning ay nangangailangan ng interbensyon upang mapataas nila ang kanilang lebel sa pagbasa. Dahil dito, ipinanukala ng pag-aaral ang kayarian ng mga araling eksemplar para kontekstwalisadong interbensyon sa mga batang non-grade ready, na nakatuon sa grupo ng mga bata batay sa kanilang pangangailangan o lebel ng pagbasa at tema ng binasa nilang salaysay sa pagtatasa gamit ang apat na makrong kasanayan sa pakikipagtalastasan.