Flashcard: Estratehiya sa Pagtuturo ng Pagbasa sa Filipino ng mga Mag-aaral sa Grade 1

Ang pananaliksik na ito ay naglalayong masukat ang epekto ng paggamit ng mga flashcard bilang estratehiya sa pagtuturo ng pagbasa sa wikang Filipino para sa mga mag-aaral ng Grade 1 sa Toybongan Elementary School. Gumamit ang mga mananaliksik ng quasi-experimental na disenyo, kung saan ang antas ng kasanayan sa pagbasa ng mga mag-aaral ay tinukoy bago at pagkatapos gamitin ang flashcard sa pamamagitan ng pre-test at post-test. Ang mga resulta ay nagpapakita ng makabuluhang pagtaas mula sa ‘’katamtaman’’ tungo sa ‘’mahusay’’ na antas ng kasanayan, na may mean score na 11.07 para sa pre-test at 16.00 para sa post-test. Ang mga natuklasan ay sumusuporta sa mga teoryang nagbibigay-diin sa bisa ng visual aids tulad ng Dual Coding Theory. Sa kabuuan, ang pananaliksik ay nagpapatunay na ang flashcards ay isang mabisang kagamitan sa pagpapabuti ng word recognition, comprehension, at memory retention ng mga mag-aaral. Iminumungkahi rin ang pagsasama ng mga flashcards sa iba pang interaktibong pamamaraan upang higit na mapahusay ang kakayahan sa pagbasa.