هزری تونڕەوی هۆکارەکانی و جێکەوتەکانی لەسەر کۆمەڵگەی کوردستانی

بەناوی خودای بەخشندەی میهرەبان          سوپاس وستایشی فراوان و بێ پایان بۆ خوای باڵا دەست، لەگەڵ داواکردنی دروود و ڕەحمەت بۆ سەر گیانی پاکی پێغەمبەر (دروودی خوای لەسەر بێت)، وەبۆسەر گیانی یار و یاوەرانی بەگشتی. پرسی توندڕەوی و ترس وتۆقاندن بە شێوەیەکی گشتی لەسەر ئاستی جیھان و ناوچەکە و ناوخۆ بوەتە پرسێکی فرە ڕەھەندو دەرکەوتوو، بە تایبەت لە ناو چینی گەنجاندا کەکرانە داینەمۆی ئەم ئافاتە گەورەیە. ئافاتێک کە زۆرێک لە توێژینەوە زانستیەکان لەبەر ھەر ھۆکارێکی خودی یان بابەتی بووبێت، بە شێوەیەکی دروست و بێلایەنانە نەیان توانی وەڵام دەرەوەی ئەو ڕاستیەبن کە ھزر وبیرکردنەوە سەرەتای ھەموو ڕەفتارێکە، بەڵکو وایان وێناکرد کە ھۆکارە کرداریەکان پاڵنەری سەرەکین بۆ پەرچەکرداری توندڕەوی و ترس و تۆقاندن. لێرەدا بە پێویستم زانی بێلایەنانە و دوور لەھەر دەمارگیریەک بە توێژینەوەیک شەن و کەوی ئەو پرسە بکەم کە ھزری توندڕەوی ئامراز و کردار نییە، بەڵکو بەرنامە و ئایدۆلۆژیایی مرۆڤەکانە و بەدرێژای مێژووی میللەتان و لەتەواوی سەردەمەکاندا بووە، کە بە پێی کەش و ھەوا و ژینگەی کۆمەڵگە و دەورووبەری کەم و زیادی کردووە. کۆمەڵگەی کوردیش وەک سەرجەم میللەتانی تر بەدوور نەبووە لە ھزری توندڕەوی، بە جۆرێک لە جۆرەکان کەمەر کێش کراوە و جێکەوتەکانی لەسەر ھەندێک لە تاکەکانی ماوەتەوە. بۆیە پێویستە کۆمەڵگەی ھۆشیار، زۆر بە توندی وەڵام دەرەوەی ئەو جۆرە لە ھزر و دیدانە بن و بەربەستی کۆنکرێتی لەبەردەمیاندا بچەسپێنرێت، تاوەکو یەک ڕیزی کۆمەڵگە و مافی تاکەکان پێشێل نەکرێت. بۆ ئەو مەبەستە توێژەر ناونیشانەکەی بەسەر دوو تەوەردا دابەش کردووە: ١. پێناسەی ھزری توندڕەوی  و ھۆکارەکانی ٢. جێکەوتەکانی ھزری توندڕەوی لەسەر کۆمەڵگەی کوردستانی. لێرەدا چۆنیەتی چارەسەر کردنی ئەم ئافاتە باس نەکراوە، لەبەر ئەوەی لەچەندین توێژینەوەی تردا ئاماژەی پێکراوە. ھیواردام بتوانم بەم توێژینەوەیە تاکی کورد ئاشنا بکەم بە ھەموو ئەو شوێنەوارە خراپانەی کە ھزری توندڕەوی لەسەر ئەم کۆمەڵگەیەی دروست کردووە.   کلیلە وشە:هزری تونڕەوی، توندوتیژی،پەڕگیری،کۆمەڵگە،کوردستان.