Hulda Filippusdóttir (1924--2022), minningarorð (in memoriam)

Hulda Filippusdóttir tilheyrði hópi frumherjanna í Jöklarannsóknafélaginu. Hún var virk í starfi félagsins alla tíð og sótti árshátíðir vel fram á tíræðisaldur. Hún lést í mars 2022, á 98. aldursári. Hulda var mikill frumkvöðull. Hún stundaði svifflug á yngri árum, útilegur og fjallaferðir alla tíð og fór m.a. fjölda ferða á Vatnajökul. Hún var gerð að heiðursfélaga JÖRFÍ á 50 ára afmælinu árið 2000. Hulda var virk fram undir það síðasta, fór m.a. þyrluferð að eldgosinu við Fagradalsfjall árið 2021. Eiginmaður hennar var Árni Kjartansson (1922–2017), einn af stofnendum JÖRFÍ og forgöngumaður um að koma á vorferðum á Vatnajökul. Fyrsta vorferð Huldu var árið 1956, og var hún jafnframt brúðkaupsferð þeirra hjóna. Sú ferð var um margt merkileg. Vorferðir hófust 1953 svo þetta var sú fjórða í röðinni og jafnframt viðameiri en þær fyrri. Unnið var m.a. að landmælingum og sett upp merki á Þórðarhyrnu, Grendli og Hvannadalshnjúk. Í ferðinni voru 13 manns, 8 karlar og 5 konur. Nafnið á Brúðarbungu syðst í Kverkfjöllum, varð til í þessari ferð. Bungan er nefnd eftir Huldu og fer vel á því að eitt af örnefnum Vatnajökuls skuli tengjast þeim brautryðjanda sem hún var. ...