Turumba sa Birhen: Pagtatanghal ng Sining, Tradisyon at Turismo ng Pakil, Laguna

Ang kolonisasyon ng Espanya sa Pilipinas ang nagpakilala sa mga sinaunang Pilipino ng mga tradisyon at kultura ng kanluraning mundo. Ang Kristiyanisasyon ng Pilipinas ay hindi mapasusubalian na nagbunga ng pagpapanibagong-hubog sa sining at lipunang Pilipino. Ang dating animistikong paniniwala at mga mimetikong pagkilos at ritwal ay napalitan ng Kristiyanong pananampalataya at mga gawaing banal na ang tuon ay mga imahen at mga santo, na dati-rati ay kalikasan, mga espiritu at anito. At ang ilang impluwensyang kanluranin sa kulturang Pilipino ay patuloy na nananatili, hindi lamang bilang kolektibong memorya bagkus ay kaganapan, hanggang sa kontemporanyong panahon. Ang papel na ito ay isang saliksik at suri sa kasaysayan, mga gawaing nakasanayan, at estetiko ng karanasan na nakapalibot sa pagdiriwang ng kakaibang prusisyon, na tinatawag na Turumba sa Birhen, sa Lupi (pista) nang Nuestra Señora de los Dolores de Turumba o Birhen ng Turumba sa Pakil, Laguna. Ito ay pagsipat, pagsuri at paghayag sa mga naratibo ng karanasan ng debosyon, at mga ugnayan sa pagitan ng Birhen at nang mga mamamayan at iba pang deboto, nang Simbahan at nang Pamahalaang Bayan, at nang buong pamayanan ng Pakil sa pangkalahatan. Pagsusumikapang matiyak kung papaanong ang isang lipunan ay ginagamit ang isang sistema ng paniniwala o kultura ng debosyon bilang buod ng pang-araw-araw na buhay na siyang nagbibigkis sa mga mamamayan at deboto, nagsisilbing natatanging pagkakakilanlan ng bayan, at imbakan ng kolektibo o sama-samang memorya at kamalayan.