Educazione letteraria di Mecenate

Abstract Quibus C. Cilnius Maecenas instructus fuerit litteris pro certo affirmari non potest, sed siue ex aequalium et posteriorum scriptorum testimoniis siue ex eius operum fragmentis eum perfecte planeque eruditum fuisse colligi licet. Nam, cum ex Etruria Romam adulescens uenisset, hic optime ab excellentissimis magistris litteris et Graecis et Latinis institutus est: omni probabilitate, quippe qui in eloquentia Asianus et in philosophia Epicureus fuisset, praeter Arium Alexandrinum, de quo mentionem Aelianus facit, non modo M. Epidium, sed Sironem et Philodemum habuit praeceptores. Is tamen, cum eloquentiae et philosophiae, tum etiam poeticae operam dedit : nonnulla enim eius fragmenta Varronem Menippeum et Lucretium et Catullum et Vergilium et Horatium et Propertium et Tibullum eum imitatum esse testantur. Postremo, ad ueriorem Maecenatis litterarum studiorum imaginem reddendam, superest ut dicam eum in Etrusca quoque disciplina et in rebus naturalibus, sicut e Plinii loco cogitur, uersatum fuisse : ex quo id effici potest, Maecenatem non solum magnum a natura sortitum esse ingenium, sed etiam optima et uaria ornatum fuisse eruditione.