TRIZ aplicado á xestión de espazos protexidos e da biodiversidade

TRIZ, acrónimo ruso da Teoría para a Resolución de Problemas de Inventiva, constitúe un conxunto de ferramentas orientadas cara á innovación sistemática, isto é, a xeración de ideas innovadoras seguindo un método estruturado que supere a pauta ensaio-erro. TRIZ está solidamente implantado en diferentes ámbitos da xestión empresarial. Algúns dos seus piares son os 40 principios de inventiva, nos que, segundo a teoría, se fundamentan todas as invencións, a noción de contradición, o resultado final ideal (RFI) ou a proposta dun conxunto de leis de evolución dos sistemas. Nesta tese analízase a aplicabilidade de TRIZ nun ámbito novo: a xestión de espazos protexidos e a protección da biodiversidade. O obxectivo principal consistiu en desenvolver un marco teórico que facilite esta utilización. Para isto, mediante unha análise bibliográfica e a visita a distintos espazos protexidos, identificáronse e escolmáronse os xeitos nos que os 40 principios de inventiva tamén se empregan neste campo. Desta maneira, preténdese facilitar a súa aplicación de forma sistemática para a xeración de ideas creativas que dean solucións ás diferentes necesidades que poden xurdir no marco da xestión de espazos protexidos e da biodiversidade ou na xestión ambiental en xeral. Finalmente, a investigación propón unha metodoloxía que permite facilitar a identificación dos principios con maior interese potencial en función do beneficio ambiental que se estea buscando e aporta unha guía resumida de utilización de TRIZ con esta intención (en galego, castelán e inglés). Deste traballo conclúese a validez de TRIZ neste novo campo de traballo e, así mesmo, o interese potencial que outras ferramentas pouco ou nada exploradas neste ámbito posúen tamén para a xestión dos espazos protexidos e da biodiversidade.