«Å nei! Skal vi lese igjen?» Dialogisk arbeid med to heile litterære verk på niande trinn

I denne artikkelen undersøker vi korleis strukturert dialogisk undervisning kan bidra til å støtte arbeid med heile litterære verk i norskfaget på ungdomstrinnet. I samarbeid med ein ungdomsskolelærar utarbeidde og observerte vi litteraturundervisning om Stargate. En julefortelling av Ingvild Rishøi (2021) og Forvandlinga av Franz Kafka (2016). Undervisninga inneheldt i hovudsak aktivitetane høgtlesing og samtalar i elevstyrte grupper og heil klasse. På bakgrunn av klasseromsobservasjon, svar på spørjeskjema og elevintervju drøftar vi korleis desse aktivitetane kan ha bidratt til å støtte lesing og fortolking av lengre tekstar blant elevar som elles les lite på fritida. Vi finn at elevane framhevar kombinasjonen av høgtlesing og samtalar om det lesne i gruppe- og heilklassesamtalar som viktig for å komme seg gjennom lesing av heile verk. Dette impliserer at lesing av heile litterære verk i fellesskap føreset at det blir sett av tid til felles lesing og repeterte samtalar om det lesne.