PEN NAME: KASAL SA PAPEL

Noong 2013, inilathala ang “Anong Pangalan Mo Sa Gabi? At iba pang tanong sa mga LGBT” nina Tetay Mendoza at Joel Acebuche (bilang mga editor). Maikli lamang ang libro at tinatalakay nito ang ilang mga popular na katanungan ukol sa buhay LGBTQIA+++. Nagsilbing inspirasyon sa akin ang pamagat ng librong ito: pangalan. Sa mata ng pangkaraniwang mamamayang Pilipino marahil, ang LGBTQIA++ ay nalalagom lang sa dalawa: tomboy (kolokyal na termino para sa lesbiyana) at bakla. Walang trans trans, walang queer queer; lahat yan ay bakla o tomboy lamang. Makapangyarihan ang pangalan. Bilang writing prompt man o sa reyalidad sa lipunan. Bilang writing prompt, nais ko’ng ihapag ang iba’t ibang mga pangalan ko at ng aking karelasyon sa mga bahagi ng aming buhay. Bilang magkasintahan, nom de guerre, at familyal na kataga. Sa partikular, may pagpokus ako sa pinanday na pangalan ko bilang manunulat. Kung paanong hinubog ito na iniisip ang protesta para sa rekognisyon ng estado sa pagmamahalan namin ng aking karelasyon.