Gramatikalizazio-prozesu bat: Baina enklitikoa

Azterlan honek proposatzen du -Baina enklitikoa deritzan euskal unitatea eskala batean sailkatzea, non tarteko lekua hartuko lukeen baina juntagailuaren eta kontzesiorako menderagailuen artean. Hipotesi hau justifikatzeko, aipatutako unitatea aztertzen da bere ezaugarri semantiko eta formalen bidez. Portaera fonikoa eta distribuzioaren portaera bezalako probek agerian uzten dute ez dela juntagailua, baina juntagailuaren idatzitako forma bera badu ere. Baina beste proba formal batzuk ikusita, ezin da -baina enklitikoa menderagailuen artean kokatu, nahiz eta bere esangurak kontzesio menderakuntzaerlazioa adierazten duen. Horregatik esaten da [–juntagailu], [–menderagailu] elementua dela. Azpimarratzen da -baina enklitikoak duen mugikortasuna esaldiko elementu ezberdinei eransteko, eta ez bakarrik aditz jokatuei, menderagailu kasuetan jazoten denez. Propietate honen azalpena gramatikalizazio prozesu batean bilatu behar dela aipatzen du ikerlanak. -Baina enklitikoak gramatikalizazio prozesu batean sartuta izanez gero, baina juntagailua baino gramatikalagoa da baina kontzesio-menderagailuak baino gutxiago. Antzeko prozesua katalanez ere ematen da, non bukatuta dagoen; euskaraz, ordea, amaitu barik dugu.