Musikalske tilnærmingar i barnehagen som støtte i barns språkutvikling

Artikkelen handlar om samanhengar mellom musikk og språk og korleis bruk av musikk i barnehagen kan støtte barns språkutvikling. Han set søkelyset på språkarbeid på småbarnsavdeling i barnehagen med barn i alderen 1–3 år. Artikkelen bygger på observasjonar av musikkstund på småbarnsavdeling og intervju med tilsette. Informantar er fem barn og fem tilsette i ein barnehage. Analysar av intervjudata viser at personalet i stor grad knyter koplinga mellom språk og musikk til utvikling av vokabular. Ei slik avgrensing står i kontrast til analysar av observasjonsdata som viser fleire døme på felles merksemd, dialog og samspel, element som er sentrale for å utvikle kommunikative og språklege ferdigheiter i tidleg språkutvikling. I drøfting vert det peika på behov for kompetanse og kunnskap hos personalet som grunnleggande, for å nytte musikk i språkarbeidet.