MƏRKƏZDƏNQAÇMA NASOSLARININ KORROZİYADAN DAĞILMA SƏBƏBLƏRİNİN ÖYRƏNİLMƏSİ VƏ QARŞISININ ALINMASI TƏDBİRLƏRİN İŞLƏNMƏSİ

Bu məqalədə mərkəzdənqaçma nasoslarının istismar prosesində korroziya nəticəsində baş verən dağılmaların əsas səbəbləri tədqiq edilmiş və onların qarşısının alınması istiqamətində effektiv tədbirlər işlənilmişdir. Aparılan analizlər göstərir ki, nasosların korroziyaya uğraması əsasən aqressiv kimyəvi mühitin təsiri, yüksək temperatur və təzyiq şəraiti, nasos materialının kimyəvi dayanıqsızlığı, həmçinin texniki xidmətin lazımi səviyyədə aparılmaması ilə bağlıdır. Tədqiqat nəticəsində müəyyən edilmişdir ki, korroziya prosesinin intensivliyi daha çox suyun və ya işlənən mayenin tərkibində turşuların, duzların, qazların (CO₂, H₂S, O₂) mövcudluğu ilə əlaqədardır. Bu amillər metal səthlərdə elektrokimyəvi reaksiyaları sürətləndirərək çarx, mil və korpus elementlərinin mexaniki möhkəmliyini azaldır.Problemin aradan qaldırılması üçün bir sıra texnoloji və kimyəvi tədbirlər təklif olunur. Bunlara paslanmayan və yüksək korroziyaya davamlı poladların, eləcə də titan və bürünc əsaslı ərintilərin tətbiqi, səthlərin epoksid və polimer əsaslı qoruyucu örtüklərlə izolyasiyası, katodik və anod qoruma üsullarının istifadə edilməsi, həmçinin işləmə şəraitinin optimallaşdırılması (pH balansının tənzimlənməsi, qaz tərkibinin azaldılması və s.) daxildir. Nəticələr göstərir ki, korroziyaya qarşı kompleks yanaşma tətbiq edildikdə nasos avadanlıqlarının istismar müddəti 1,5–2 dəfə artır, enerji səmərəliliyi yüksəlir və texniki qəzalardan yaranan iqtisadi itkilər əhəmiyyətli dərəcədə azalır. Açar sözlər: mərkəzdənqaçma nasosu, korroziya, korroziyanın sürəti, inhibasoya üsulu ilə vüdafiə, korroziya prosesləri, korroziyadan müdafiə xərclə.