TOSHKENTNING O‘RTA ASRLAR TARIXI BO‘YICHA YANGI ARXEOLOGIK MA’LUMOTLAR

Maqola 2021–2022-yillarda Shashtepa yodgorligida miloddan avvalgi II asrga oid diniy-memorial majmuani konservatsiya qilish loyihasi doirasida amalga oshirilgan arxeologik qazuv tadqiqotlari natijalariga bag‘ishlangan. Mualliflarning ta’kidlashicha, XX asrning 70–90-yillarida hozirgi Toshkent shahri hududida olib borilgan arxeologik tadqiqotlar natijasida bu yerda qadimdan Chirchiq daryosi suvlari va yer osti manbalari bilan ta’minlangan sug‘orish tarmoqlari asosida shakllangan, dehqonchilik xo‘jaligiga tayangan zich aholi joylashuv tizimi — mikrooazis vujudga kelgani haqida xulosa qilingan. Ushbu mikrooazis hududi so‘nggi o‘rta asrlar davrida taxminan Toshkent rustoqlari maydoniga mos kelgan.Shashtepa yodgorligining miloddan avvalgi II asrga oid diniy-memorial majmuasining halqasimon devori tashqarisidagi barcha atrof hudud o‘zlashtirilgani va bu yerda Qoraxoniylar davriga mansub manzilgoh shakllangani haqida xulosa qilish mumkin. Rivojlangan o‘rta asrlar davrida ushbu manzilgoh chegaralari aniq belgilangan bo‘lib, bu davrga kelib Salar–Jun, Karasu va Bozsu kabi barcha sug‘orish tarmoqlari, shuningdek ularning irmoqlari va kanallari xo‘jalik tizimida to‘liq jalb etilgan.Somoniylar va Qoraxoniylar davrida esa ushbu infratuzilmaning markazida Binkat shahri joylashgan edi.