Milli neft bazarının inkişafinda françayzinq

Karbohidrogen resursları ilə bol respublikamızın iqtisadi hazırlıq səviyyəsi ölkədə formalaşmış "xammal" oriyentasiyalı modeldən qurtulmaya məhdudiyyətlər gətirir. Digər tərəfdən, neftin xam şəkilində ixracı ilə bağlı beynəlxalq bazar konyunkturası da neft gəlirlərindən stabil və planauyğun şəkildə istifadə imkanlarını azaldır. Belə ki, bu bazarda qiymətlər hər bir oyunçunun davranışından asılılıqda vaxtaşırı arzuolunmaz nəticələr yaradaraq kataklizm və böhranlarla müşayiət olunur. Elə buna görə də, ölkədə «xammal» oriyentasiyalı modeldən «milli istehsala və daxili bazara köklənən iqtisadi inkişaf konstruksiyalı» modelə keçid zərurətliyi artır. Beynəlxalq təcrübə bəyan edir ki, yalnız milli bazar yüksək inkişaflı və asılı olmayan iqtisadiyyatın möhkəm təməlini təşkil edə bilər. Beynəlxalq bazar da zəruri bir kateqoriyadır və o, özünün son dərəcə böyük əhəmiyyəti ilə üzvi surətdə daxili bazarla bağlılıqda onun da dolğunluğunu və möhkəmliyini təmin etməlidir. Bununla belə, yaddan çıxarılmamalıdır ki, «milli bazar» prioriteti energetik təhlükəsizliyin təminatı üçün də istisnasız əhəmiyyətlidir. Lakin, bu gün daxili bazar əmtəə dövriyyəsinin həcmi və struktur baxımından yetərli inkişaf etməmişdir.