کردەیێن هەستدەربڕینێ د گوتارا سەرۆک مەسعود بارزانیدا، گوتارا ڕیفراندۆمێ وەکوونموونە

 کردەیێن هەستدەربڕینێ، ئێکە ژ ئەوان کردەیێن گرنگ، ئەوێن دەربڕینێ ژ بارێ دەروونییێ ئاخڤتنکەرى دکەن. ئەڤ کردەیە ڕولەکێ گرنگ د گەهاندنا پەیاما ئاخڤتنکەریدا دگێرن و هەست و هەلویستێ دەروونییێ ئاخڤتنکەرى بەرامبەر ڕویدان و کەسان دیاردکەن. ئەڤ ڤەکۆلینە گرنگییێ ددەتە کردەیێن هەستدەربڕینێ، وەکو ئامرازەکێ سەرەکی د پرۆسەیا پەیوەندیکرنێدا و گرنگییا ئەڤان کردەیان، د گوتارا سیاسیدا زێدەتر دیار دبیت، ب تایبەتی د دەمێن هەستییار و چارەنڤیسازدا، ژبەرکو ڕابەر و کەسایەتیێن سیاسی ب رێکا وان هەست و سۆزێن خۆ دیاردکەن، پشتەڤانییێ کۆمدکەن و شەرعیەتێ ددەنە بڕیار و هەلویستێن خۆ، لەورا ئەڤ کردەیە پڕانییا جاران دبنە ئەگەرێ هەستورورژاندنێ. ئارمانجا ڤەکۆلینێ ئەوە، بۆ مە دیارببیت چاوان بارزانی د گوتارا خۆ یا تایبەت ب ڕیفراندۆما کوردستانێڤە، دەربڕین ژ بارێ دەروونییێ خۆ کرییە؟ دیسان بۆچی و ب چ مەرەمەکێ ئەڤ جۆرە کردەیە بکارهیناینە؟ و چاوان هەولدایە ب رێکا ئەوان کاریگەرییێ ل سەر وەرگران دروستبکەت؟ ڤەکۆلین ل سەر بنەمایێ جۆرێن کردەیێن ئاخڤتنێ ل دویڤ مودێلا (سیرل و ڤاندەرڤێکن)ى و ب رێبازا (وەسفى، شڕۆڤەکارى) هاتییە ئەنجامدان. داتایێن ڤەکۆلینێ ژ گوتارەکا بارزانى، ئەوا دەربارەى ڕیفراندۆمێ ل پارێزگەها دهۆکێ پێشکێشکرى هاتییە وەرگرتن و شڕۆڤەکرن. دەرئەنجامێن ڤەکۆلینێ نیشانددەن، کو د گوتارا ناڤبریدا (49) کردەیێن هەستدەربڕینێ ب شێواز و پلەیێن جۆراوجۆر هاتینە بکارهینان، د ناڤ ئەڤان کردەیاندا، کردەیێن: (گازندەکرن، پیاهەلدان و سوپاسیکرن) زۆرترین ڕێژە بخۆڤەدگرن. هەروەسا، شێوازێ دەربڕینا ئەڤان کردەیان، پترییا جاران ب شێوازێ (ڕاستەوخۆ) و ب پلەیێن: (باش و گەلەک باش) یا کاریگەریێ هاتینە پێشکێشکرن، کو ئەڤە ستراتیژیەتا گوتاربێژى و مەرەمێن ل پشت گوتارێ روون دکەت. ڤەکۆلین تیشکێ دئێخیتە سەر گرنگییا شڕۆڤەکرنا پراگماتیکییا زمانێ سیاسی بۆ تێگەهشتنا پەیام و ئارمانجێن گوتاربێژى.