Menningarmiðaðar kennsluaðferðir

Aukinn fjölbreytileiki í íslenskum grunnskólum skapar mörg tækifæri fyrir kennara til þess að nýta menningu, reynslu og tungumál nemenda í kennslu. Menningarmiðaðar kennsluaðferðir, sem byggja á kenningum um fjölmenningarlega menntun, bjóða upp á hagnýtan ramma til að skapa fjölbreytt og valdeflandi námsumhverfi fyrir öll börn. Markmið þessarar greinar er að kanna viðhorf íslenskra kennaranema til menningarmiðaðra kennsluaðferða og rannsaka reynslu þeirra af vinnu með grunnskólabörnum með fjölbreyttan tungumála- og menningarbakgrunn. Auk þess verða vangaveltur þeirra um stöðu fjölmenningarlegrar menntunar innan kennaranámsins skoðaðar. Gögnum var safnað með ítarlegum einstaklingsviðtölum við tíu nema sem leggja stund á meistaranám til kennsluréttinda við tvo íslenska háskóla en við úrvinnslu gagnanna var þemagreining notuð. Niðurstöður gáfu vísbendingar um að viðkomandi háskólar legðu ekki nægilega áherslu á þróun fjölmenningarhæfni kennaranema. Þrátt fyrir jákvætt viðhorf þátttakenda gagnvart menningarmiðuðum kennsluaðferðum, þá skorti þátttakendur dýpri skilning á hugmyndafræðinni sem liggur að baki slíkum aðferðum. Þátttakendur virtust aðallega leggja áherslu á íslenskukennslu og innleiðingu fjölbreytts námsefnis frá mismunandi menningarheimum. Enn fremur gagnrýndu margir þátttakendanna hve lítið vægi fjölmenningarleg menntun hefði innan kennaranámsins, þrátt fyrir aukinn fjölbreytileika barna í grunnskólum. Draga má þá ályktun að mikilvægt sé fyrir háskóla sem bjóða upp á kennaramenntun að efla verðandi kennara með heildrænni þekkingu á fjölbreytileika skólabarna, sem og þekkingu á viðeigandi kennsluaðferðum sem styðja við þennan fjölbreytileika.