Wildmisdaad: ’n konseptuele definisie

Wildmisdaad bedreig daagliks die voortbestaan van talle wildspesies. Internasionale en nasionale belanghebbendes prioritiseer die bekamping van wildmisdaad deur voorrang aan dié kwessie op omgewingsagendas te gee, maar teenstrydig hiermee bestaan daar tans geen internasionale verdrag wat uitsluitlik op die bekamping van wildmisdaad fokus nie. ’n Moontlike rede hiervoor is dat geen universele definisie van wildmisdaad opgeteken is nie. Hoewel wildmisdaad ’n algemene gebeurtenis op Suid-Afrikaanse bodem is vanweë die oorvloed van wildspesies wat hier voorkom, is die konseptualisering van wildmisdaad in Suid-Afrikaanse wetgewing en beleid nie voor die hand liggend nie. Ten einde die konseptuele leemtes in die omgewingsreg te vul, het hierdie artikel ’n tweeledige doel, naamlik om (a) ’n konseptuele definisie van die begrip wildmisdaad vanuit ’n omgewingsregperspektief vir die doel van hierdie bydrae te formuleer en voor te stel; en (b) ’n omvattende konseptuele ontleding aan die hand van die geformuleerde voorgestelde definisie ((a) hier bo) te onderneem om die konsep van wildmisdaad binne die Suid-Afrikaanse omgewingsregkonteks vas te stel. Ten einde wildmisdaad konseptueel te definieer, moet die begrippe omgewingskade, omgewingsmisdaad, wild en misdaad afsonderlik aan die hand van relevante bronne ontleed word. In hierdie artikel word verbandhoudende definisies en konsepte voorts aan die hand van die voorgestelde definisie oorweeg en ontleed ten einde ’n ruim konseptuele definisie van die begrip wildmisdaad binne die Suid-Afrikaanse konteks te skep.