De Portugal para Galiza. Dez cartas portuguesas a Manuel María

O poeta galego Manuel María mantivo unha intensa relación con Portugal e coa cultura portuguesa, nomeadamente na súa vertente literaria. A admiración polo país irmán levouno a visitalo en múltiplas ocasións, a intervir alí en moitos actos culturais e mesmo a publicar nel algunhas das súas obras e bastantes artigos en revistas e xornais lusitanos. É por isto que Manuel María foi o escritor galego da segunda metade do século xx máis coñecido e apreciado en Portugal. De todo isto dá claro testemuño, ao tempo que serve de comprobación, a correspondencia que mantivo con escritoras e escritores portugueses, a maioría do norte do país, durante as catro décadas finais da centuria precedente e os primeiros anos da actual (arrredor de 80 autores/as, máis de 600 cartas, todas custodiadas na Casa-Museo Manuel María en Outeiro de Rei). Neste contributo ofrécese só unha breve mostra dese epistolario, que pretende ser representativa das diferentes épocas e dalgúns dos máis significados interlocutores, como adianto da próxima edición completa do epistolario portugués de Manuel María.