Yog Me Ishwar-pranidhan Ki Mahima

Ishwar karm, karm ke fal, sanskar evam kaal se pare, sarvagya, sarvavyapi, sarvottam, sarvagud sampanna, anandamay, aishwaryo se paripurna aur sabhi guruon ke guru hain. Apne sabhi karmo ko ishwar ke prati samarpit kar dena, ishwar-pranidhan hai. Shrimadbhagwatgeeta me bhagwan Shrikrishna Arjun se kahte hai ki "jo bhakt sada ananya bhav se pratidin nirantarta ke sath mera hi smaran karta rahta hai, us nitya bhakti se yukt yogi ko mai sahjta athwa bina kisi pareshani ke sheeghrata se hi prapt ho jata hoo."Ishwar-pranidhan se apne bhiter ke ahankar ka nash hota hai, jisse jeevan saral aur swabhavik ho jata hai. Manushya jeevan ka antim uddeshya hi hai parmatma se milan, tabhi param anand ki prapti hogi atah us anand arthat bhagwat prapti ke liye ishwar-pranidhan aavashyak hai. Man ke shuddhatam bhav se hi ishwar-pranidhan sambhav ho pata hai. Sanatan dharm ke sabhi shastron me ishwar-pranidhan ki vidhi-poorvak charcha ki gayi hai. Yah na kewal yogiyo ke lakshya siddhi me sahayak hai balki sansarik manushyo ke sabhi abhavo ko door karne wala hai. Is prakar yog me ishwar-pranidhan ki anupam mahima varnit hai.