Bruikbaarheid van ChatGPT-4V(Vision) om lugfoto’s te ontleed, dryfvere wat aanneem kan bevorder en implikasies vir Geografie-klaskamers

ChatGPT-4V kan lugfoto’s redelik suksesvol ontleed, tog is die implikasies daarvan vir Geografie-klaskamers nog nie ondersoek nie. Die doel van hierdie verkennende gevallestudie was drievoudig, naamlik om te bepaal (a) hoe bruikbaar ChatGPT-4V is om lugfoto’s te ontleed, (b) watter dryfvere die aanneem daarvan kan bevorder en (c) wat die implikasies vir Geografie-klaskamers kan wees indien dit aangeneem word om lugfoto’s te ontleed. Ek het eers tien gesprekke met ChatGPT-4V gevoer om sy geografiese kennis en ontleding van lugfoto’s te beoordeel. Daarna het ek die Kunsmatige-Intelligensie-Aanvaarding-Voorspelling-Model (KIAVM) toegepas om die dryfvere te identifiseer wat die aanneem van ChatGPT-4V kan bevorder. Laastens is die implikasies vir Geografie-klaskamers bepaal. ’n Gemengde-metodes-benadering is gevolg. Die gesprekke was kwalitatief van aard, terwyl kwantitatiewe data tydens die toepassing van die Kunsmatige-Intelligensie-Aanvaarding-Voorspelling-Hulpmiddel (KIAVH) ingesamel is. Die bevindinge toon dat ChatGPT-4V bruikbaar is om lugfoto’s te ontleed. Die gehalte van sy geografiese kennis is redelik goed, die lugfoto’s is redelik suksesvol ontleed en ChatGPT-4V kon lugfoto’s gebruik om ’n gevallestudie en ’n toets (beide met memoranda) te skep. ChatGPT-4V het min taalfoute gemaak, maar dit kon oortuigend hallusineer. Agt van die nege dryfvere van die Kunsmatige-Intelligensie-Aanvaarding-Voorspelling-Model kan die aanneem van ChatGPT-4V in Geografie-klaskamers kan bevorder. Daar kan voorspel word dat ChatGPT-4V vir etiese en onetiese doeleindes aangeneem sal word, daarom behoort beleid en strategieë in plek gestel te word om verantwoordelike gebruik te bevorder. ChatGPT-4V hou belangrike implikasies vir Geografie-klaskamers in. Onderwysers en dosente kan dit gebruik om hulle werkslas te verlig aangesien die response goed is en die foute maklik reggestel kan word. ChatGPT-4V kan gebruik word om gedifferensieerde onderwys te bevorder aangesien verpersoonlikte leergeleenthede geskep kan word. Leerders en studente moet egter gemaan word om sy response krities te beoordeel. Kostes kan bespaar word en toegang tot lugfoto’s kan bevorder word. Indien ’n leergeoriënteerde benadering tot assessering gevolg word, kan geleenthede vir KI-plagiaat beperk word.