2. SAMINOR

SAMINOR-guoradallam la Sáme varresvuoda dutkama guovdátja ájnnasamos dutkamprosjækta ja akta dajs ájnnasamos gáldojs mij guosská máhttuj sáme ja nuorttalijvuona åbbålasj álmmuga varresvuoda ja iellemdile birra. Badjásasj álggoálmmukperspektijvva dahká SAMINOR sierralágásj dáhtábáŋŋkan sihke nasjåvnålasj ja rijkajgasskasasj dásen. SAMINOR tjadáduvvá guovlojn gånnå edna sáme årru. Måttijn suohkanijn la aj stuorra guojna álmmuk. SAMINOR-dutkamav máhttá gålmå oajvvesuorggáj juohket: Rubbmelasj varresvuohta, mentála varresvuohta ja varresvuodadievnastusáj fálaldagá álmmugij. Dálátjij la SAMINOR dáhtájt tjoahkkim guovten ájggudagán, SAMINOR 1 jagijt 2003–2004 ja SAMINOR 2 jagijn 2012–2014. SAMINOR 1 tjadáduváj Álmmukvarresvuoda instituhta siegen madi SAMINOR 2 tjadáduváj Sáme varresvuoda dutkama guovdátjis aktu. Dálla plániduvvá ådå dáhtátjoahkkim, SAMINOR 3, gånnå vijdedip geografijjalasj guovlov váj buorebut gåbttjå guojna, merrasáme ja oarjjelsáme årromguovlojt. Vuostasj oassen SAMINOR 3, tjadáduvvá kvalitatijva ságájdahttemguoradallam mij gåvvit mij álmmuga ietjas mielas la guoskavasj mij guosská sijá varresvuohtaj ja rijbbamij ja majt varresvuodaguoradallam sijá guovlon bierri vuorodit. SAMINOR-dutkambåhtusa li moaddásijda ávkken: sáme álmmugij ja álmmugij ietján, Sámediggáj, suohkanijda ja fylkajda, nasjåvnålasj oajválattjajda ja varresvuoda barggijda. Duodden doajmmá SAMINOR “EU-kontroallan” juohkka ájnna oassálasste varresvuodas. Gå gåvvit álmmuga varresvuodav, de máhttá SAMINOR viehkken liehket váj hieret iehpevarresvuodav ja buoret varresvuoda dievnastusáj fálaldagáv álmmugij mijá moattebelak nuorttalamos rijkkaoasen.