Homenaxe ós tres poetas medievais da Ría de Vigo: Martín Códax. Mendiño, Johán de Cangas

A Real Academia Galega, en sesión plenaria do 19 de novembro de 1997, acordou por unanimidade dedicar o 17 de maio de 1998 a homenaxear tres voces da nosa poesía medieval: Martín Codax, Mendiño e Johán de Cangas. Homenaxe é ofrecer a súa obra poética en edición pouco problemática para que chegue a todos os letraferidos; homenaxe é ofrecer estes once poemas, algúns maxistrais, noutros idiomas, única forma de que se acheguen a eles os amantes da poesía non familiarizados coa modalidade medieval da nosa lingua, e homenaxe é ofrecer, mesmo aos moi eruditos, estudos que, por unhas ou outras razóns, foron marxinando as circunstancias ou non posúen a presenza a que teñen dereito aínda hoxe.