PROFESSOR BAYRAM ƏHMƏDOV ZAMANIN YADDAŞINDA

Hündürboylu, gülərüzlü, səliqəli və şux geyinən Bayram müəllim elə ilk görüşdən adamı özünə cəlb edirdi. Həm alimliyi, həm müəllimliyi, həm də insanlığı ilə yadda qalan, ehtiramla yad edilən şəxsiyyət idi. Dilçi alim Bayram Baxşalı oğlu Əhmədov 1935-ci ilin aprel ayının 28-də Ağdaş rayonunun Pirkəkə kəndində anadan olmuşdur. 1943-1949-cu illərdə kənddəki yeddiillik məktəbdə oxumuş, 1949-1953-cü illərdə Ağdaş Pedaqoji Texnikumunda təhsil almışdır. Texnikumu fərqlənmə diplomu ilə bitirərək Qazax rayonunun Dağkəsəmən kənd orta məktəbində bir il sinif müəllimi işləmiş, 1954-1959-cu illərdə o vaxtkı Lenin adına APİ-nin (indiki ADPU) tarix-filologiya fakültəsində təhsil almışdır. 1959-cu ildə təyinatla Mingəçevir şəhərinə işə göndərilmiş Bayram müəllim əvvəl fəhlə-gənclər axşam məktəbində müəllim ışləmiş, bir il sonra həmin orta məktəbdə direktor müavini vəzifəsinə irəli çəkilmişdir. 1962-1970-ci illərdə Mingəçevir şəhərindəki 4 nömrəli beynəlmiləl şəkkizillik məktəbin direktoru olmuşdur. Mingəçevir şəhərindəki yaşlı nəsilın nümayəndələri indi də Bayram müəllimi səmimi, qayğıkeş insan kimi xatırlayır. Elmi tədqiqat işinə olan maraq Bayram müəllimi yenidən ali məktəbə-APİ-yə, bu elm məbədinə gətirdi. 1970-ci ildən 1993-cü ilə qədər APİ-də əvvəl baş müəllim, sonra dosent vəzifəsində çalışdı. Azərbaycan dili və ədəbiyyatı fakültəsində dekan müavini oldu.