“Beyin ölümü” diaqnozunun qoyulması

Beyin ölümü həmçinin “nevroloji meyyarlara görə ölüm” kimi adlandırıla bilər. Beyin ölümü ürək-qan damar sisteminin fəaliyyət göstərdiyi zaman, beyin və beyin kötüyü funksiyalarının geridönməz itirilməsi səbəbindən tənəffüsün süni tənəffüs aparatı ilə təmin olunması hesabına meyitin yaşamasıdır. Klinik ölümdən fərqli olaraq, beyin ölümü diaqnozu qoyulmuş şəxsin həyata qayıtması qeyri-mümkündür. İnsanda beyin ölümü onun birincili və ikincili zədələnməsi zamanı baş verir. Kəllə-beyin travmaları, kəllədaxili qansızma, beyin infarktı və şişləri, kəskin hidrosefaliya, kəllədaxili cərrahi müdaxilələr zamanı baş verən beyin ölümü birincili zədələnmə nəticəsində olan ölümlərə aiddir. İnsan beyninin ikincili zədələnmələrinə onun dolayı yolla zədələnməsi (müxtəlif mənşəli hipoksiyalar, qan dövranının dayanması və ya pozulması) aiddir. Beyin ölümü, bioloji ölüm olduğu kimi, şəxsin ölüm anı hesab edilir.