Høgtlesing av sørsamiske eventyr i gamma – eit leseprosjekt med elevar på 7. trinn

Korleis kan lesing av sørsamiske eventyr skape engasjement for litteratur hos elevar på mellomtrinnet? Vi har gjennomført eit opplegg med høgtlesing og litterære samtalar med fire elevgrupper på 7. trinn i ei tradisjonell sørsamisk gamme. Empirien, som består av observasjonsnotat, refleksjonstekstar og notat frå samtalar med lærarane, er analysert gjennom ein kvalitativ innhaldsanalyse. Resultata viser at gutane deltar mest aktivt i samtalane i alle fire elevgruppene. Gutane ser ut til å bli kollektivt engasjerte. Som gruppe er jentene meir passive, sjølv om dei også likte eventyra. I artikkelen diskuterer vi om det var sjangeren (sørsamiske eventyr), konteksten (gamma som stad) eller metoden (den undersøkande tilnærminga) som bidrog til å skape ei lesehending som appellerte breitt, men spesielt til gutane. Prosjektet viser noko av potensialet som ligg i å lese samisk litteratur i ein autentisk kontekst. Artikkelen er derfor aktuell både i diskusjonar om lesing av samiske tekstar i norskfaget og meir generelt om engasjement i litteraturarbeid.