Sámegiela hástalusat, seailluheapmi ja ovdáneapmi Guovdageainnus

Dáruiduhttin lea leamaš stáda sámepolitihka prinsihpalaš vuođđun 1880-logu rájes, ja dáruiduhttin lei boađusin stáda doaimmain sámegiela ja kultuvrra ektui. Dat politihkka almmolaččat loahpahuvvui nuppi máilmmi soađi áiggi 1940–1945, ja Norgga stuoradiggi almmolaččat mearridii molsut sámepolitihkalaš prinsihpa dáruiduhttimis seailluhit sámegiela ja kultuvrra almmolaččat. Liikká leat olbmot ođđa sámepolitihka áiggi guođđán eatnigielaset ja sámi kultuvrralaš dovdomearkkaid nugo biktasiid, namaid jnv. Dát dáruiduvve go mánát dahje nuorraolbmot geavahišgohte dárogiela ja nugo dážabiktasiid dahje go váhnemat válljeje dárogiela vuosttašgiellan mánáidasaset. Orro leame dego dáruiduvvan livččii joatkán vaikko dáruiduhttin lei almmolaččat loahpahuvvon. Mun lean dutkan sámegiela saji ja hástalusaid Guovdageainnus, ja dán artihkkalis mun dutkandieđuid vuođul čilgen mot Guovdageainnu olbmot aktevran čáhkkegohte saji sámegillii almmolaš giellan.