Hovudmistenkt: Teksten

Artikkelen stiller saman nokre element frå Rita Felskis bok The Limits of Critique (2015) med Hans Skjervheims essay «Kritikk av mistankens hermeneutikk» (1980). Påstanden i artikkelen er at dei problema Felski peikar på i samtidige lesingar, vart analysert på filosofisk grunnlag hos Skjervheim 35 år før. Mellom dei to skriftene har ein kritisk eller mistenksam lesemåte fått stort gjennomslag, både i akademia og den ålmenne diskusjonen om kanselleringskulturen, som har drive denne lesemåten til det ytste. Skjervheim skisserte nokre grunnleggjande problem med slike lesingar, samstundes som han opna for legitime kritiske lesingar. Felski starta med å praktisera kritiske lesingar, men drøftar i boka si grensene for lesemåten. Trass i faglege og generasjonsmessige skilnader kjem dei to til relativt like konklusjonar.