Os nomes do Ceo

A presentación por parte da Agrupación Astronómica Coruñesa Ío e da Real Academia Galega dunha lista oficial de nomes galegos das 88 constelacións, en novembro de 2020, supuxo un pequeno fito para mellorar o noso vocabulario técnico no ámbito da astronomía. Ese foi, porén, só un primeiro paso: queda un inmenso traballo por facer para a normalización lingüística neste campo científico. Necesitamos ter nomes para todo tipo de obxectos celestes, ou regras xerais para nomealos, mais tamén cómpre investigar para identificarmos e recuperarmos formas tradicionais galegas para algúns corpos singulares e fenómenos celestes.