“Tabi-Tabi-Folkloradyo!” Ng DZUP1602 – dzup.org: Pagmumuni-Muni Sa Kaalamang-Bayan At Gawaing EkstensyonNg Talastasan Sa Himpapawid

Ibinabahagi ng papel na ito ang kasaysayan, karanasan, at paglalakbay ng “Tabi-tabi-Folkloradyo! (TFR!), isang programang pangradyo sa DZUP 1602 KHZ (AM Band) at dzup.org na nagsibing daluyan ng talastasan hinggil sa kaalamang-bayan ng Pilipino. Mula sa munting hakbang ng pagmumungkahi, balakin, at panukala noong 2012, lumago ang TFR! bilang mahalagang salupongan ng akademya at bayan, na sa loob ng limang taon, ay nagpatuloy sa pagbuo ng mga diskurso sa wika, panitikan, at kultura. Susing natuklasan sa pag-aaral na ito na ang bisa ng radyo bilang midyum ng gawaing pang-ekstenyon o serbisyong pampubliko: na nagsahimpapawid at nagpapalaganap ng Indigenous Knowledge Systems and Practices (IKSP), nakapag-uugnay ng iba’t ibang disiplina ng kaalaman, at nakapagbibigay-liwanag sa mga penomenong pangkultura sa wikang nauunawaan ng bayan. Ambag at implikasyon ng pag-aaral sa TFR! ng kahalagahan ng institusyonal at teknolohikal na espasyo para sa paghihimpapawid ng kolektibong kaisipan, pagpapayaman ng folkloristics, at paghamon sa pangingibabaw ng Kanluraning kaisipan, at kaalaman sa akademya. Tunguhin nito samakatuwid, na makita na ang TFR! bilang patuloy na institusyonal at teknolohikal na plataporma ng interdisiplinaryong salupongan na nagtataguyod ng kaalamang bayan (o dunong katutubo) bilang batayan ng Agham Panlipunan at Pilosopiya sa Pilipinas. Ang panawagan sa kasalukuyan ay malinaw: palakasin ang munting hakbang sa paglinang ng transkultural na kasanayan sa pakikipagkapwa, pakikisalamuha, at pagbabahagi ng kaalaman upang maging mahalagang salupongan (pakikipag-ugnayan, salubungan, at pakikipagpalitan) ng kultura, akademya, at mamamayan. Sa kabuuan, pinatutunayan ng TFR! na ang radyo, bilang modernong teknolohiya sa komunikasyong pangmadla at napapanahong midyum (sa tulong ng digital media) ng umalohokan, ay makabuluhang daluyan at plataporma ng paglilingkod-bayan, at matatag na pedestal kung gayon ng pagwaragwag (pagsahimpapawid, pagbabahagi, pagtatanghal) ng kaalamang-bayan (o dunong katutubo) na nag-uugnay sa nakaraan, kasalukuyan, at hinaharap ng sambayanang Pilipino. Mga Susing Salita: kaalamang bayan (dunong katutubo), radyo (pagsasahimpapawid), paglilingkod bayan (serbisyong pampubliko), salupungan.